Shady EL-Balad اصحى يا بلد
مصر حتفضل غاليه علياولاد البلد
ولاد البلد؟؟؟؟
اه انتوا كلكم
حد معترض
اعترض براحتك
ولا تكون لغيرك ناكر
و ان حسبتونى معاكم
حأكون ليكم شاكر
العواف
«« إنها الست شادية »»
ذهبت كما سيذهب كل إنسان، تلك هي القاعدة يا حاجة فاطمه …
و ستبقى كما يبقى كل مُبدع، و #شاديه في الفن هي القمة و القاعدة و الإستثناء …
«« إنها #الست #شادية »»
يا حـبـيـبـتي يا شادية
دعواتكم
اللهم ارحمها قدر رحمتك
و ارزق اهلها و ارزقنا الصبر
« شاديه ده وصف مش مجرد اسم »
جنان التشجيع في مدرجات ستاد القاهرة هو صوت شاديه في يا حبيبتي يا مصر.
حنان الأنثى مهما كانت مسئوليتها هي تعبيرات وش شاديه في مراتي مدير عام.
صرخة الإنسان في وش جبروت الحرب هو صوت شاديه في الدرس انتهى لـموا الكراريس.
نسمة هوا حنينه في عز الحر هو صوت شاديه في نشيد الوطن الاكبر.
ريحة بحر اسكندريه هي صوت شاديه في شباكنا ستايره حرير.
نظرة تحدي الحق في وش الظلم هي نظرة فؤاده و هي بتفتح الهويس.
معنى البهججه هو صوت شاديه في سكر حلوة الدنيا سكر.
لا تحاولوا أن تصفوا الست شاديه …
شاديه لا يمكن للكلمات أن تصفها بسهوله, شاديه هي الوصف, هي من كسرت كل القواعد لتبني منها هرم خالد فريد متفرد لها وحدها, و هي القمة المتربعه فوق هذا الهرم .
إنها الإستثناء …
«« إنها #الست #شادية »»
يا طير يا مسافر لبعيد،
روح قول للأسمراني …
ليه سافر و نسي المواعيد،
يا حبيبي يا أسمراني…
جوني سألوني…
جاوبتهم عني دموع عيني…
«« إنها #الست #شادية »»
#يا_حبيبتي_يا_شادية
فجأة
تبقى ماشي،
فجأة تركن
فرحان،
فجأة تحزن
حماسي،
فجأة تجزع
و أنت رايح،
فجأة ترجع
في يونيو تنده يناير،
تلف في دواير،،،مفاجئة
وسط الصيف الثاير
تجلب ربيع الشتا،،،فجأة
يا باصص في المراية،
فضيت المراية فجأة !
فات اللي فات،،
فجأة
و اللي جاي ؟
،،، خليه مفاجئة
ما كنت مش موجود
و فجأة اتولدت…فجأة !
…
18 August 2015
شادي الغزاوي
#فجأة #مش_قصيدة_شعر #شادي_البلد
#مش_قصة_قصيرة … بطة الموسم
#مش_قصة_قصيرة
زي كل موسم
جهزت البطه
بس المره دي و هي زعلانه انه مش حياكل منها عشان معندوش اجازة في العيد
استبشرت لما سمعت اسمه بيتهامسوا بيه من بعيد لبعيد
سألت : ايه يا ولاد ,,, وصل ؟
جاوبوها : لأ اصبح شهيد
.
.
.
بكت؟
فرحت؟
انهارت؟
اتصبرت بجنة مشتاقه لها؟
كتمت؟
كرهت؟
زغرطت؟
اتونست بجلابية اشتراها لها؟
محدش عارف من قلة الصمت …
وحشها … ده الشيئ الوحيد الأكيد
…
شادي الغزاوي
اكتوبر 2014
#مش_قصة_قصيرة …
#مش_قصة_قصيرة
سأله : شايف نفسك فين بعد خمس سنين ؟
لم يفاجئه السؤال بل فاجئته نظرات عينيه حين تسللت إلى تقويم موضوع بعناية اسفل زجاج سطح المكتب يتوسط قمة سطورها “نوفمبر 2014”
لم يندهش حين بدأ الرقم المطبوع بلون أسود على الورقة الرماديه يتناقص امام عينيه
فقط تسائل لماذا لا يتغير الشهر أيضاً !
انتبه لصوت همهمات , نعم هي بصوته , ولكن كيف ينطق دون إرادته !!؟
نوفمبر 2014
نوفمبر 2013
نوفمبر 2012
نوفمبر 2011
نوفمبر 2010
تصاعدت نبرة الهمهمات , فعاد سريعاً ينظر لسائله ليتأكد انه لا يزال يحيا بقوانين البشر فوجده ينظر إليه بتململ في إنتظار الإجابه
فأجابه و هو في طريقه للمغادره متخطياً المفاجأة و الإندهاش و التساؤلات ممسكاً بزمام الهمهمات
” أوعدك أول ما أعرف كنت شايف إني حأكون فين و فعلياً كنت فين في الخمس سنين اللي فاتت حتكون أول واحد يعرف إجابة السؤال ,,, بس توعدني تكون انت كمان حضرت إجابة السؤالين ,,, العواف “
شادي الغزاوي
نوفمبر 2014
النداءات النهائية لمقاطعي انتخابات #مصر الرئاسية
لينك المقال ع الفيسبوك :
http://is.gd/ShadyGhzEgyptElections2014-ع فكرة الانتخابات دي مسرحية
طب انزل بوظلهم المسرحية
-ع فكرة الانتخابات دي حتتزور
طب انزل ما تسيبهمش يزوروا صوتك محدش يقدر يزور ملايين الاصوات
-ع فكرة الانتخابات دي حيضيعنا فيها تصويت الناس اللي مش فاهمه حاجه
طب انزل انت يا عم الفاهم قول رأيك
-ع فكرة انا مش عاجبني الاتنين
طب انزل و ابطل صوتك و قول للاتنين انهم مش عاجبينك
-ع فكرة انا لا يمكن اعصر ع نفسي لمون تاني
ولا انا عصرته أولاني ولو يهمك تعرف رأيي في الليمون حتلاقيه هنا :
http://wp.me/p1BBZ2-3K
-ع فكرة الانتخابات دي نتيجتها معروفه
طب انزل انت صوت عكس النتيجه المعروفه لو مش عجباك
-ع فكرة ده استفتاء مش انتخابات بجد
طب انزل سعادتك اكتبلهم الكلام ده على ورقة التصويت رسالتك حتوصل صدقني
-ع فكرة صوتي مش حيفرق و انا مستني الافلام دي تخلص و حنبدأ الثورة بجد و مستعد اموت بس الحلم يتحقق
الثورة مش بزراير و إن كان ع الموت ده امره سهل
محدش فينا نزل مظاهرة و كان نازل ناوي يموت كنا نازلين نغير و مفيش حاجه في الدنيا بتتغير 100% مره واحده
ده لو حصل بيسموه معجزة
و إنك تتنقل من عصر استفتاء الــ99% لعصر انتخابات ده في حد ذاته تغيير
الثورة وسيلة التغيير لما كل البيبان تتقفل
اعتبر الانتخابات دي باب بتخبط عليه
انت حر
و لأن انا باحترم حريتك و رأيك عارف إن في الانتخابات ليك 3 اختيارات
انك تختار احد المرشحين
أو إنك تبطل صوتك
أو إنك تقاطع
بس لازم تفهم إن الحكومه الحالية و القادمة بعد الانتخابات بتفهم إن المقاطعين موافقين على اللي بتعمله أو ع الأقل لو معترضين فمكسلين يعلنوا إعتراضهم بانهم ينزلوا و يبطلوا صوتهم
و اقرب و ابسط مثال اللي بيحصل بعد استفتاء الدستور
نسبة المقاطعين كانت اكبر من المشاركين بس النتيجه في الاخر إن اللي وافقوا تقريبا 98%
يعني الحكومة فهمت إن فقط 2% من الــ50 مليون ناخب عندهم استعداد ينزلوا و يقولوا لأ
أنا عارف انك مستعد تنزل مظاهرة و تقول لأ
و يمكن مستعد كمان تنزل و تعتصم بالشهور و تقول لأ
بس تقدر تقدر تعتبر مشاركتك في الانتخابات محاوله لأنك تحتفظ بالمظاهرة و الاعتصام لسبب تاني
زي ما حصل ايام دستور الإخوان المشاركة و نسبة اللي قالوا لأ برغم تمرير الدستور كانت من اسباب سقوط الدستور باللي عملوه و تسهيل المهمه على كل دعوات المظاهرات و الاعتصامات اللي حصلت بعده
مش حاقولك ما تقاطعش عشان كده حتكون في نفس الخانه مع الإخوان اللي اعلنوا انهم مقاطعين
و مش حأقولك ما تقاطعش لأننها نعيش في ازهى عصور الديمقراطيه
انا بس حأقولك ما تقاطعش الانتخابات لأن انت –ايوه انت- قادر تعمل تغيير
الحقيقه التغيير هو انت
صوتك في المظاهرات تغيير
خيمتك في الاعتصام تغيير
و صوتك في الانتخابات حتى لو ابطلته هو كمان تغيير
أصوات الناخبين في انتخابات برلمان 2005 اجبرت القشاة إنهم ما يزوروش النتيجه و الحزب الوطني سقط
و لولا إنضمام عدد من المستقلين له ما كانوا وصلوا للاغلبيه
انتوا عارفين يعني ايه الحزب الوطني في 2005 يخسر انتخابات؟؟
عارفين يعني ايه تكون نتيجته في بعض المحافظات في عز هيمنته ع السلطه (لم ينجح احد) ؟؟
كل ده حصل لسبب واحد إن عدد و مش عدد كبير نزل و ما انتخبش مرشحي الحزب الوطني
حتقولي ان ده كان مالهوش نتيجة؟
لأ كان له نتيجة إنهم قعدوا يخترعوا و يؤلفوا قوانين من 2005 لغاية 2010
و 5 سنين من التأليف و القمع كشفتهم امام الملايين
مش حأقولك انزل عشان الشهداء شايـفـيـنـك
بس اقدر أقولك انزل و اكتب عـِـنــد في جـبـيـنـَـك
و خليك فاكر
انت و المرشحين ممكن تموتوا لحظة إعلان النتيجة و تأثير صوتك هو اللي حيعيش
انزل اختار واحد منهم أو ابطل صوتك انت حر
و اخر كلامي شوية أرقام:
إجمالي عدد الناخبين تقريبا 51 مليون
عدد الناخبين من 18 إلى 20 سنة 4,076,157
عدد الناخبين من 21 إلى 30 سنة 15,642,397
عدد الناخبين من 31 إلى 40سنة 12,038,017
مجموع عدد الناخبين من 18 إلى 40 سنة 31,756,571
و لو إعتبرنا إن سن الشباب من 18 لــ 40 سنة فمعنى كده عزيزي الشاب عزيزتي الشابة أعزائي الواقفين في البلكونة إنه بالأرقام انتوا اللي قادرين تحددوا كل حاجة في الانتخابات دي
انتوا اللي قادرين تسيبوها تمشي كمسرحية
و انتوا اللي قادرين تبوظوا المسرحية بانكم تنزلوا تقولوا رأيكم
نقول تاني؟… إجمالي عدد الناخبين تقريبا 51 مليون
مجموع عدد الناخبين من 18 إلى 40 سنة 31,756,571
عدد الناخبين من 18 إلى 20 سنة 4,076,157
عدد الناخبين من 21 إلى 30 سنة 15,642,397
عدد الناخبين من 31 إلى 40سنة 12,038,017
إحصائيات الناخبين حسب تقسيم المرحلة العمرية
شادي الغزاوي
22May2014
شادي الغزاوي يحدثكم من تالته شمال عن الإعلام و انتخابات رئاسة #مصر
بمناسبة الحشد الإعلامي لإنتخابات رئاسة #مصر
افتكرت
في أوائل التسعينات -يعني قبل ثورة الاتصالات–
الإعلام قرر (أو نفذ قرار) يحشد جماهير كرة القدم لمبارة منتخب مصر و المغرب
فضلوا يقولوا إنها مصيرية للتأهل لكأس العالم بما إنها المباراة الإفتتاحية للمجموعة و مع اقوى فريق فيها
خصوصا إن المنتخب المغربي كان معلم علينا شويتين في الفتره دي لإن دفاع منتخبنا كان في رشاقة كرش الكابتن ميدو
المهم…
ستاد القاهرة كان على اخره
و الأمن المركزي طبعا مارس هوايته في الجري ورانا بالخياله و صاحبي كان حيتهرس في السور الحديد اللي قبل البوابات من كتر تدافع الجماهير اللي بتجري من الخياله اللي اصلا محدش فاهم داخلين فينا بالخيول ليه ما احنا واقفين طوابير لوحدنا
بس الحمدلله إن ده كان اقصى تطور للاسلحه وقتها محدش عارف لو كان الكلام ده بعد الحمله الفرنسيه و دخول المدافع في منظومة السلاح المصري كان حصل لنا ايه
المهم…
نجحنا في إنقاذ صاحبي بإننا طلعناه قعد فوق السور اللي كان حيتفعص فيه و لحقنا كراسي فاضيه بالعافيه في (تالته شمال)
المدرجات على اخرها
الناس مشحونه لااااازم نكسب جااااامد
و من فرط الشحن فجأة لقينا الجماهير في نص الشوط الأول بتشتم غانا و كوت-دي-فوار مع إن المبارة مع المغرب !!!
بعد المباراه قابلت مشجع الزمالك المشهور (الخواجه) اللي كان قاعد معانا في المدرج فسألته
هو انتوا فجأة ليه شتمتوا غانا و كوت-دي-فوار ؟
فجاوبني بكل ثقة و إختصار و بدون دخول في تفاصيل قد تحدث خلل في الأمن القومي “عشان نـِـهِـتـُـهـُـم”
الحقيقه ما فهمتش إزاي يعني هتافنا في المدرجات اللي احنا سامعينه بالعافيه (إن غاب القط إلعب يا فار,,,أبو أم غانا على كوت-دي-فوار) حيخوف و يهدد عبيدي بيليه و إسماعيل فوفانا و يخلينا نكسب المغرب
بس قلت ماشي هو اكيد عارف التفاصيل دي اللي مش ممكن واحد في سني ما كملش 15 سنه يحيط بها علماً
هما قعدوا يشتموا و انا قعدت اشرح لمن حولي إن كوت-دي-فوار هي هي نفسها ساحل-العاج
اصل انا كنت مثقف و باجيب الأهرام الرياضي من مصروفي فعرفت إنهم نفس البلد
المهم…
دخل فينا جول من الهجمه الوحيده تقريبا للمغرب
المدرجات ولعت
و محدش عارف مين بيقول ايه
ربع بيشتم غانا و كوت-دي-فوار
ربع بيشتم الجهاز الفني
ربع بيشتم المغرب
ربع بيشتم الحكم لانها -حسب رأيهم-تسلل واضح فاضح جارح شارح التواطؤ الفايح
سألت صاحبي هو محدش بيشجع الفريق ليه؟؟؟
قال لي انت لسه مكسوف تشتم
قلت يا عم ما هي لو الشتيمه بجيب الاجوان مكنش حد لا غـُـلـُـب ولا اصلاً حد كان لعب !!!
المهم…
بعد فاصل فوران إرباع الشتايم المِشَكِلَه
شجعنا كام دقيقه كده تأدية واجب فاتعادلنا
هيييييييييييييييييييييييييييييييييييييييييه
لأ مش هيييه طبعاً ,,, الإعلام قال لااااااااازم نكسب
الماتش خلص
يعني كاس العالم ضاع ؟؟؟
مش حنجيب اجوان تاني في كاس العالم زي جون مجدي عبد الغني؟؟؟
ولا حد حيرقص ريكارد زي جمال عبد الحميد؟؟؟
إذن … فهو الإحباط و الإنهيارات و الازمات القلبيه و ناس بتلطم
و ناس عايزه تطلع تضرب الأمن المركزي زي ما ضربهم الصبح و ناس بدأت فعلا تحدفهم بأي حاجه في أي حته
و طبعا كانت بتيجي فينا احنا
المهم…
روحنا بيوتنا مهزومين
نجر ذيول خيبة الأمل
فالتعادل يعني ضياع حلم التأهل لكأس العالم -زي ما الإعلام قال لنا- مع إنها أول مباريات المجموعه
بس خلاص رااااااااحت ,,, ما هو مش ممكن نكسب المغرب في المغرب,,,
دي ما حصلتش من أيام ما عقبه بن نافع فتح شمال افريقيا إنطلاقا من مصر
المهم…
بعد ما روحنا بدأنا نتابع التليفزيون حيقول ايه
و المحللين في إذاعة الشباب و الرياضه حيسلخوا اللعيبه و الجهاز الفني إزاي
,,, أي حاجه نفش فيها غليلنا يا جدعااااااااااان
ثم تحدث الإعلام
و تحدث المحللون في إذاعة الشباب و الرياضه
إتكلموا عن ايه؟؟؟
عن مباراة مصر و المغرب التي انتهت بالتعادل الإيجابي في إطار تصفيات “كأس الأمم الافريقيه“
نعم!!!!؟
اومال مين اللي ودانا الماتش على اساس إنه “تصفيات كأس العالم” !!؟
الإجابه : هما هما نفس المذيعين اللي قالوا كده غيروا كلامهم بعد التعادل و قالوا كده
طب هل كانوا ناسيين و إعتذروا!!؟
الإجابه : لأ
طب هل غانا و كوت-دي-فوار معانا في المجموعه!!؟
الإجابة: محدش قال
طب مين عمل فينا كده ليه عشان يحصل ايه !!؟
الإجايه : (صوت صرصور الغيط و أصوات ضفادع في الخلفية)
طب عايز تقول ايه يعني بعد كل ده؟؟؟
اه معلش نسيت اشرح كلامي اصلي نسيت اننا متعودين في مدارس مصر إن دروس القراءة لازم تتشرح
عايز اقول لحضراتكم إن دلوقتي عندكم فرصة اكبر للبحث عن المعلومات و قنوات اكتر
احنا كان كل اللي عندنا للحصول على معلومات عن المباراة دي 3 قنوات تليفزيون و معاهم خمس ست إذاعات و مجلتين رياضيتين
دلوقتي احنا بنعرف من بعض المعلومه عن طريق الانترنت قبل ما المسئولين بيعرفوها و قبل ما الإعلام بيعرفها
دلوقتي سهل جدا إن الإعلام ما يضحكش عليك إلا لو انت اخترت إنه يضحك عليك
دلوقتي المعلومات متاحه و التلفيق متاح و الكدب اكتر من الاتنين شغلانة حضرتك إنك تبحث و إنك تعلم ولادك يبحثوا
عصر ( ما هما إللي قالولي ) ده إنتهى
مش عارف تبحث و مش عارف تصدق مين شوف حد أصغر منك و إسأله لأن هو اقدر منك على التعامل مع ادوات عصره
زي ما انت كنت بتعرف تظبط قنوات التليفزيون الملون زمان و اهلك ما بيعرفوش لأن عصرهم كان عصر الراديو و التليفزيون ابو لمبه بتسخن في 10 دقايق
ما تصدقش كلام الإعلام على إنه كلام أكيد
عصر (يا عم ده مكتوب في الجرنان) انتهى الجرايد حاليا كل اخبارها بايته
ولو مش مصدقين إن كلام الإعلام مش اكيد احب افكركم بحاجتين
المحللين الاستراتيجيين اللي ماليين القنوات حاليا و بيتكلموا عن تفاصيل المؤامرة الكونيه على مصر
هما نفسهم اللي قالوا لنا من كام سنة إن صدام حسين حيكسب امريكا في الحرب لو فكرت تنزل بقوات ع الأرض
و فجأة لقينا الدبابات الامريكية بتعمل نزهة خلويه على ضفاف أنهار بغداد
و نفس القنوات دي و المذيعين اللي فيها هما اللي قالوا لنا إن المجمع العلمي في التحرير اتحرق
مع إنه كان لسه ما اتحرقش
ولما اتحرق فعلا قالوا إن المتظاهرين حرقوه
مع إن الميدان كان تقريبا مفيهوش اي متظاهرين
و لو مصدقين إن المبنى ده كله ممكن يتحرق بكام ازازة مولوتوف يبقى الحقيقة مفيش اي معنى لكل اللي انا كاتبه ده
و انا باكتب الكلام ده دلوقتي عرفت تفاصيل حادث إطلاق نار في مكان بيني و بينه 40 كيلو قبل ما كل القنوات تنقل الخبر و ما اظنش الجرايد حتلحق تكتب كل التفاصيل اللي انا عرفتها
المهم …
ابحث و اجري ورا المعلومة ,,, قليلين جدا اللي حينقلوا لك الحقيقه
و إلا حتلاقي نفسك قاعد بتشجع في مباراة في تصفيات كأس افريقيا على إنها اهم مباراة في تصفيات كاس العالم .
المتفائل الفاني
شادي الغزاوي
18 May 2014
رايح فين يا حسين
ما تستغربوش
اصل انتوا ما تعرفوش
ولا تعرفوهوش
ولا حتى انا لحقت
هو اللي انا مصدق إنه خالي أكيد
و حافضل مستنيه يعدي علينا في البيت
قالوا لي النهارده “ده راح” اول ما صحيت
رايح فين يا حسين !!!
رايح فين يا جدع,,,هو انت لسه جيت ؟؟؟
هو بابتسامته اول حد بافتكره أول ما اشوف الجيتار
هو اول اسم بيتكتب على سابورة عقلي
مع دخان كل صاروخ يفرقع و ناس تجري بتضحك
وحشاني مقالبه من غير رعب ولا تهزيق يولد تار
و تنطيط نبض قلبي مع شقلباته ع الأوتار
هو اللي بافتكره و اتبسم
مع كل تانيه لرجل البنطلون الجينز
مع كل تشميره للقميص
مع كل بـُـرنيطه تعجبني و ماتجيش مقاسي
مع كل بدله فخمه و مجنونه
هو كل بالطو عجيب غريب شيك
هو السارح عكس إتجاه الموضه
هو الجلابيه بقماش البيرمودا
هو اللي كتبت كلام ما نشرتوش و انا سامعه بصوته بيغنيه
قلت يمكن في يوم يعدي ولا ألاقيه
و يقول ده جدا جدا وحش بس يللا نغنيه
هو الامريكاني اللي عرفني بلاويها
هو الجـَشـِع الرأسمالي بياع كل حاجه من حبه فيها
هو مش أضواء نيون الإعلانات
بس هو كل الحاجات و الراديوهات
هو اللي اتمنيت اكون زيه
هو اللي خفت لأكون زيه
هو جنان التمانينات
هو حلم التسعينات
و الحلم ما ينفعش يتقال إنه مات
هو اللي باستناه شهور
عشان استناه كل يوم
و كإنه عشق تاه
باب باراب باراب بااا باااه
هو احلى حاجة في اكتر فيلم شوفته في حياتي
هو اللي قال لي “خليك شيطان و إلبس ملاك”
هو اللي غناهالي بصوت بيغمزلي عشان ما اعملهاش
هو اللي انا شايفه قصادي و مجنني طول البعاد
أنا في اللابوريا
و هو لسه قادر في الحزن يفرح
هيييييييييييييييييييييييييييييييييه
هو حتعرفوه في يوم من الأيام
يمكن في يوم بسبعين الف عام
هو؟؟؟
هو #حسين_الإمام
18-مايو-2014
«الدستور فين التفويض اهو»
قريب جدا حتقابله ماشي في الشارع,
لابس-لامؤاخذه- اللباس في عز البرد,
في ايده اليمين رايه بيضاء متقطعه,
في ايده الشمال بواقي رايه مطبوع عليها صورة شخص ما ملامحه مش واضحه ما عدا إبتسامه ثلجيه باهته,
معلق في رقبته بدوباره كُتيب طباعة هيئة الاستعلامات طبعه فاخره,
و بيهتف بكل شموخ:
«الدستور فين التفويض اهو»
«كليوباترا حلوه، السوبر أحلى، مارلبورو فاجرة و قادره»
»«الدستور فين التفويض اهو
»«كُلُّه في الأول وعود بس ايه بيجرى بعده«
»الطاهره نادتني يا سي عبده»
«الدستور فين التفويض اهو»
«ماتخافيش يا حاجه ولا انت يا استاذ»
«المايه حتقطع إملوا الفنطاس»
«الدستور فين التفويض اهو»
اهو
اهو
اهو
ها أوو أاااااو
«الدستور فين التفويض اهو»
Shady EL-Balad اصحى يا بلد 